ក្នុងរយៈពេលប្រមាណ មួយសប្ដាហ៍ចុង ក្រោយនេះ សិស្សថ្នាក់ទី៩ ជាច្រើន នៅរាជធានី ភ្នំពេញ បន្តមក បន់ស្រន់ នៅចំណុចព្រះអង្គដងកើ មុខព្រះបរម រាជវាំង ដើម្បីសុំ សេចក្ដីសុខ ក៏ដូចជាទំនុកចិត្ត សម្រាប់ការប្រឡង នៅថ្ងៃទី ៣០ វិច្ឆិកាខាងមុខ។
ស្របពេលដែល ការប្រឡងសញ្ញាប័ត្រ បឋមភូមិចូល មកដល់ថ្ងៃទី ៣០ វិច្ឆិកាខាងមុខនេះ សិស្សថ្នាក់ទី៩ ជាច្រើន បានមកបន់ស្រន់សុំ សេចក្ដីសុខ នៅចំណុចព្រះអង្គ ដងកើ មុខព្រះ បរមរាជវាំង។ ការមកស្រន់នេះ ជាជំនឿ ដែលពួកគាត់ ជឿជាក់ថា អាចធ្វើឱ្យពួកគាត់ សុខសប្បាយ ពេលប្រឡង ក៏ដូចជា មានទំនុកចិត្ត សម្រាប់ ការប្រឡងផងដែរ។ យ៉ាងណាម៉ិញ ពួកគាត់លើកឡើងដែរថា ទន្ទឹមនឹង ការបន់ស្រន់នេះ ពួកគាត់ក៏បាន ខិតខំសិក្សា រៀនសូត្រផងដែរ ព្រោះពួកគាត់ ដឹងថា បើបន់ស្រន់ហើយមិនប្រឹងរៀន នោះប្រឡង មិនជាប់ឡើយ។
សម្រាប់ការប្រឡង សញ្ញាប័ត្រមធ្យមសិក្សា បឋមភូមិ សម្រាប់ឆ្នាំ២០២០ ក្នុងបរិបទជំងឺ កូវីដ ១៩ នេះ ក្រសួងអប់រំ បានកំណត់យកថ្ងៃទី ៣០វិច្ឆិកា និងថ្ងៃទី១ ខែធ្នូ សម្រាប់ ការប្រឡង។ សម្រាប់ការប្រឡងរបស់ ថ្នាក់ទី៩នេះ គឺមានមុខវិជ្ជា ប្រឡងចំនួន ១១ ក្នុងនោះរួមមាន តែងសេចក្ដី ការសរសេរតាមអាន គណិតវិទ្យា រូបវិទ្យា គីមីវិទ្យា ជីវវិទ្យា ផែនដីនិងបរិស្ថានវិទ្យា សីលធម៌-ពលដ្ឋវិជ្ជា ភូមិវិទ្យា ប្រវត្តិវិទ្យា និងភាសាបរទេស។ សម្រាប់សិស្សដែល គថ្លង់វិញ គឺមិនមានវិញ្ញាសាប្រឡង សរសេរតាមអាននោះទេ នេះបើតាមសេចក្ដីណែនាំ របស់ក្រសួងអប់រំ។
សម្រាប់ការប្រឡងថ្នាក់ទី ៩នេះ ក្រសួងអប់រំក៏បានណែនាំឱ្យ នាយកសាលាត្រូវរៀបចំ សម្អាតទីធ្លា ធ្វើអនាម័យ អាគារ ក៏ដូចជាបន្ទប់ប្រឡង ឱ្យបានស្អាត និងត្រូវកំណត់ ចំនួនសិស្សត្រឹម ២៥នាក់ ក្នុងមួយបន្ទប់ តែប៉ុណ្ណោះ។ សម្រាប់ការ ប្រឡង សញ្ញាប័ត្រមធ្យមសិក្សា ទុតិយភូមិ សម្រាប់សិស្សថ្នាក់ទី ១២ វិញក្រសួងអប់រំ បានកំណត់ សម័យប្រឡងថ្ងៃទី ២១ ខែធ្នូឆ្នាំ២០២០៕
