ចាប់ពីថ្ងៃទី ២១ រហូតមកដល់ ព្រឹកថ្ងៃទី២៣ធ្នូនេះ មានពលករខ្មែរ ចេញពីប្រទេសថៃ ចូលតាមច្រកទ្វារ អូរស្មាច់ខេត្តឧត្តរមានជ័យ ចំនួន ៤០៤នាក់ ក្នុងនោះបានយក សំណាកចំនួន ១៣៦នាក់ទៅធ្វើ តេស្ត ហើយ បានយកពួកគេ ទៅធ្វើចត្តាឡីស័កនៅតាមទីតាំងចំនួន ៣កន្លែងរួចរាល់។
លោក វេជ្ជបណ្ឌិត ឃ្លោក ហួត ប្រធានមន្ទីរសុខាភិបាល ខេត្តឧត្តរមានជ័យ បានឲ្យដឹងនៅថ្ងៃទី២៣ ធ្នូនេះថា ក្នុងចំណោមពលករខ្មែរមកពីថៃចំនួន ៤០៤នាក់នោះក្នុងនោះថ្ងៃទី ២១មានពលករខ្មែរ ចំនួន១៧៦នាក់ និងបានយកសំណាកចំនួន៣៦នាក់ ទៅពិនិត្យរក មេរោគកូវីដ១៩។ នៅថ្ងៃទី២២ ខែធ្នូ ឆ្នាំ២០២០ មានពលករចំនួន ១៣៤នាក់ ក្នុងនោះពលករចំនួន ៥៨នាក់បានបញ្ជូនទៅយកសំណាក រកមេរោគកូវីដ១៩ផងដែរ និងព្រឹកថ្ងៃទី ២៣ធ្នូនេះ មាន៩៤នាក់ ក្នុងនោះមាន ៤២នាក់ត្រូវយកសំណាក។
លោកបានបន្តថា ពលករទាំងនោះ បានចាកចេញពីប្រទេសថៃ តាមច្រកអន្តរជាតិអូរស្មាច់ បានដឹកតាម រថយន្តកងទ័ព យកទៅធ្វើចត្តាឡីស័ករយៈពេល ១៤ថ្ងៃនៅក្រុងសំរោង។
លោក ឌី រ៉ាដូ អភិបាលរងនិង ជាអ្នកនាំពាក្យសាលាខេត្តឧត្តរមានជ័យ បានឲ្យដឹងនៅថ្ងៃទី២៣ ខែធ្នូដែរថា «ឥឡូវនេះទីតាំងធ្វើចត្តាឡីស័កទាំង៣ របស់ខេត្តសម្រាប់ដាក់ពលករខ្មែរ ចេញពីថៃនោះបានពេញ អស់ហើយ។ ដូចនេះចំពោះ ពលករដែលត្រូវចូលមកតាម ច្រកខេត្តឧត្តរមានជ័យ នៅថ្ងៃនេះ នឹងត្រូវបញ្ជូនតាមរថយន្ត កងទ័ពទៅធ្វើចត្តាឡីស័ក នៅខេត្តសាមីរបស់ពួកគេរៀងៗ ខ្លួនវិញ»៕
