បន្ទាប់ពីល្បីល្បាញរឿង មន្ត្រីពេទ្យ នៃមន្ទីរពេទ្យបង្អែក ស្រុកព្រះស្ដេច នាំគ្នាផ្ដិត មេដៃប្ដឹងលោក យូ ស៊ីឡិ ប្រធាន ការិយាល័យសុខាភិបាលស្រុក ប្រតិបត្តិព្រះស្ដេច និងបងប្រុសរបស់ លោកឈ្មោះ យូ ស៊ីណា ជាប្រធានមន្ទីរពេទ្យបង្អែកស្រុក ព្រះស្ដេច រួមនិងបក្ខពួក៤នាក់ទៀត ករណីកិបកេង លុយពុករលួយ ស៊ីដាច់ លុយកូនចៅ និងដឹកនាំប្រកាន់ បក្ខពួកនិយម នោះមក
ស្រាប់តែមិនបានប៉ុន្មានថ្ងៃផង លោក យូ ស៊ីឡិ និងលោក យូ ស៊ីណា ត្រូវបានថ្នាក់ដឹកនាំសម្រេចផ្ទេរភារ កិច្ច ឱ្យមកបម្រើការងារ នៅមន្ទីរសុខាភិបាល ខេត្តព្រៃវែង.ជាបណ្ដោះអាសន្ន។ នេះបើយោងតាមប្រភពនានា ក៍ដូចជាសាម៉ីខ្លួន លោក យូ ស៊ីឡិ ផ្ទាល់។
សូមជម្រាបថា កាលពីថ្ងៃទី១៧ ខែធ្នូ ឆ្នាំ២០២០ សារព័ត៌មានបានផ្សព្វផ្សាយថា ប្រធាន(អីឌី)ស្រុកព្រះស្ដេច ត្រូវមន្ត្រីក្រោមឱវាទប្ដឹងរឿងកិបកេងលុយពុករលួយស៊ីដាច់លុយកូនចៅនិងដឹកនាំប្រកាន់បក្ខពួកនិយម។ ក្នុងខ្លឹមសារនៃអត្ថបទ គឺបាន ដកស្រង់តាមបណ្ដឹង របស់មន្ត្រីពេទ្យ នៅមន្ទីរពេទ្យបង្អែកស្រុកព្រះស្ដេច ចំនួន១៦នាក់ ដែលបានប្ដឹងទៅ សម្ដេចក្រឡាហោម កាលពីថ្ងៃទី១៥ ខែធ្នូ ឆ្នាំ២០២០ ដោយស្នើរសុំឱ្យ សម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ចាត់វិធានការ ចំពោះ លោក យូ ស៊ីឡិ ដែលបានដឹកនាំប្រកាន់បក្ខពួកគ្រួសារនិយម ប្រព្រឹត្តអំពើពុករលួយ គាបយកលុយពីអ្នកជំងឺ និងស៊ីដាច់លុយ របបការងារកូនចៅជាដើម។ល។
លិខិតនោះបញ្ជាក់ថា លោក យូ ស៊ីឡិ បានដឹកនាំង្កើតបក្ខពួកនិយមក្នុងមន្ទីរពេទ្យបង្អែកស្រុកព្រះស្ដេច.រួមមាន៖
ទី១៖ លោក យូ ស៊ីឡិ ប្រធានODស្រុកព្រះស្ដេច។២៖ លោក យូ ស៊ីណា ប្រធានមន្ទីរពេទ្យបង្អែកស្រុកព្រះស្ដេចត្រូវជា(បងបង្កើតរបស់លោក យូ ស៊ីឡិ)។៣៖ លោក ហាស់ ចំរើន អនុប្រធានប្រធានមន្ទីរពេទ្យបង្អែកស្រុកព្រះស្ដេច។៤៖ លោក ឌៀប សាវរ័ត្ន គណនេយ្យមន្ទីរពេទ្យបង្អែកស្រុកព្រះស្ដេច។៥៖ លោក ជួប សេងវន្នី ទទួលបន្ទុកផ្នែកព័ត៌មានមន្ទីរពេទ្យបង្អែកស្រុកព្រះស្ដេច។
៦៖ អៀង ចន្ទរិទ្ធិ ប្រធានរដ្ឋបាលមន្ទីរពេទ្យបង្អែកស្រុកព្រះស្ដេច។
អ្នកទាំង៦នាក់ខាងលើ បានឃុបឃិតគ្នាប្រព្រឹត្តអំពើពុករលួយធ្ងន់ធ្ងរ និងកេងប្រវ័ញ្ចលុយក្នុងមន្ទីរពេទ្យ។ រួមមានលុយ .ប.ស.ស.ដែលទូទាត់ថ្លៃសេវាព្យាបាល.មន្ត្រីរាជការ.កម្មករ.កម្មការិនី.និយោជិក.កងកម្លាំងប្រដាប់អាវុធជាសមាជិកបេឡាជាតិ.របបសន្តិសុខសង្គម.មិនដែលចែកអោយបុគ្គលិកទេ។ខណៈពួកខ្លួនជាអ្នកប្ដឹង បានខិតខំថែទាំព្យាបាល និងផ្ដល់សេវាកម្មដល់អ្នកជំងឺ ក៍ដូចជាអ្នកមកទទួលសេវា ចាប់តាំងពីឆ្នាំ២០១៨ រហូតមកដល់បច្ចុប្បន្ន។ មិនតែប៉ុណ្ណោះសូម្បីតែលុយក្បាលកូន ដែលសម្ដេច កិត្តិព្រឹទ្ធិបណ្ឌិត ប៊ុន រ៉ានី ហ៊ុន សែន ឧបត្ថម្ភដល់ពេទ្យឆ្មប ក្នុង១ករណី៤០ ០០០រៀល តែជាក់ស្ដែងទទួលបានតែ១៦ ០០០រៀលតែប៉ុណ្ណោះ។
រីឯប្រាក់ចំណូលដែលបានពីការព្យាបាលជំងឺ ក្នុងមន្ទីរពេទ្យ ០១%សម្រាប់បង់ជូនរដ្ឋ ។៣៩% សម្រាប់ផ្គត់ផ្គង់ក្នុងមន្ទីរពេទ្យ និង៦០% សម្រាប់បែងចែកដល់បុគ្គលិកប៉ុន្តែជាក់ស្ដែងពួកគេពុំបានបែងចែងឱ្យបុគ្គលិកគ្រប់តាមលក្ខ័ណ្ឌ ៦០%នោះទេ
លើសជាងនេះទៅទៀត លុយវាយតម្លៃប្រចាំត្រីមាស១០០% ដែលមន្ទីរពេទ្យទទួលបាន គឺត្រូវបែងចែងឱ្យបុគ្គលិក៨០% និង២០%សម្រាប់ដំណើរការផ្គត់ផ្គង់មន្ទីរពេទ្យ។
លុះជាក់ស្ដែង៖ ពួកគេមិនដែលបែងចែកតាមការកំណត់របស់ក្រសួងសុខាភិបាលឡើយ។ខណៈពួកគេរៀបគម្រោងធ្វើតារាង២ផ្សេងគ្នា ១ច្បាប់សម្រាប់ទុកឱ្យមន្ទីរសុខាភិបាលត្រួតពិនិត្យ រីឯ១ច្បាប់ទៀត ទុកបែងចែកដល់បុគ្គលិក ដែលតារាងទាំង២ច្បាប់នេះ មានតួរលេខខុសគ្នា ចំពោះលុយរបស់មន្ទីរពេទ្យ២៥០លានរៀល ក្នុង១ឆ្នាំៗ ដែលក្រសួងផ្ដល់ឱ្យ គឺក្រុមលោក យូ ស៊ីឡិ បានធ្វើវិក្កយបត្រក្លែងក្លាយ ដើម្បីកិបកេងលុយទាំងនោះទុកចែកបក្ខពួកខ្លួន.ដោយមិនយកមកទិញសម្ភារៈប្រើប្រាស់ក្នុងមន្ទីរពេទ្យឡើយ។
លើសជាងនេះទៅទៀតលោក យូ ស៊ីឡិ បានជ្រើសរើសមន្ត្រីជាប់កិច្ចសន្យា(មន្ត្រីខ្មោច)ចំនួន៤នាក់ ដែលមានតែឈ្មោះ ប៉ុន្តែមិនមកបម្រើការងារ ដើម្បីកិបកេងផលប្រយោជន៍ផ្ទាល់ខ្លួន ទង្វើបែបនេះវាបានផ្ទុយទៅនិងគោលការរបស់ក្រសួងសុខាភិបាល យោងតាមអនុក្រឹត្យលេខ៦៥.អ.ន.ក្រ-ប.ក.ចុះថ្ងៃទី០១.ខែមេសាឆ្នាំ២០១៦ របស់រាជរដ្ឋាភិបាល ស្ដីអំពីការគ្រប់គ្រងមន្ត្រីរាជការស៊ីវិលនិងមន្ត្រីជាប់កិច្ចសន្យា គឺមិនអនុញ្ញាតឱ្យប្រធានអង្គភាព ឬមន្ត្រីណាម្នាក់កាត់ប្រាក់បៀវត្ស.ម៉ោងយាម.ប្រាក់សម្រាលកូន.ប្រាក់ប៉ះពាល់សុខភាព.របស់បុគ្គលិក.និងលាភសការៈផ្សេងៗរបស់មន្ត្រីរាជការបានឡើយ។
សេចក្ដីរាយការណ៍បានឱ្យដឹងទៀតថា ក្រោយមានបណ្ដឹង និងល្បីតាមបណ្ដាញសង្គមបែបនោះហ់យ នៅថ្ងៃទី២១ ខែធ្នូ ឆ្នាំ២០២០ លោក យូ ស៊ីឡិ ប្រធាន(អូឌី)ស្រុកព្រះស្ដេច រួមនិងបងប្រុសរបស់លោកគឺលោក យូ ស៊ីណា ប្រធានមន្ទីរពេទ្យបង្អែកស្រូកព្រះស្ដេច ត្រូវបានថ្នាក់ដឹកនាំខេត្ត សម្រេច ផ្អាកតួនាទី និងឱ្យមកបម្រើការងារ នៅមន្ទីរសុខាភិបាល ខេត្តព្រៃវែង ជាបណ្ដោះអាសន្ន។
ជាមួយគ្នានោះលោក យូ ស៊ីឡិ ក៍បានថ្លែងទទួលស្គាល់ដែរថា រូបលោកពិតជាត្រូវបានផ្ទេរភារកិច្ច ឱ្យមកបម្រើការងារនៅមន្ទីរសុខាភិបាលខេត្ត មួយរយៈប្រាដកមែន។
មិនតែប៉ុណ្ណោះទេ មានការលេចឮមកថា ពលរដ្ឋនៅស្រុកព្រះស្ដេច.ត្រៀមផ្ដិតមេដៃ ដើម្បីប្ដឹងសុំដកហូតដី សាធារណៈមួយកន្លែង ដែល លោក យូ ស៊ីឡិ កំពុងគ្រប់គ្រងកាន់កាប់ ក្នុងពេលបំពេញកិច្ចការងារកន្លងមក លុះអស់ការងារនៅទីនោះហើយ ទើបមានអ្នកចង់សាររើ យកដីនោះមកទុកជាសម្បត្តិរដ្ឋ ឬទុកឱ្យប្រធាន(អីឌី) ក្រោយដែលគេឡើងថ្មីជំនួស ៕
