បារាំងកំពុងពិចារណា បិទប្រទេស ជាលើកទី៣ ដោយសារតែ ការឆ្លងរាលដាល នៃវីរុសកូវីដ១៩ ។ រដ្ឋមន្ត្រីក្រសួង សុខាភិបាលបារាំងលោក Olivier Veran បានប្រកាសថា បារាំង អាចនឹងចាត់វិធានការ តឹងតែងបំផុតដើម្បី ការពារពលរដ្ឋក្នុងនោះមានទាំងការបិទប្រទេស ជាលើកទី៣ ផងដែរ ។
ការប្រកាសខាងលើកើត ឡើងក្រោយពេល មានក្តីបារម្ភ ពីការឆ្លងកូវីដ-១៩ក្នុងឱកាសបុណ្យគ្រឹស្តស្មាស់ និងចូលឆ្នាំសកល។ លោកOlivier Veran បានបន្តទៀតថា ក្រុមការងារបានតាមដាន យ៉ាងយកចិត្តទុកដាក់លើស្ថានភាព ឆ្លងកូវីដ-១៩ ដើម្បីទប់ស្កាត់ឲ្យបានទាន់ពេលវេលា ។
បច្ចុប្បន្នបារាំងមាន ករណីឆ្លងកូវីដ-១៩ ថ្មីប្រមាណ១.៥០០នាក់ជារៀងរាល់ថ្ងៃ ។ កាលពីថ្ងៃទី២៥ខែធ្នូបារាំង បានរកឃើញករណីឆ្លងកូវីដ-១៩ ទម្រង់ថ្មីពីប្រទេសអង់គ្លេស ហៅថា VUI-202012/01 បានបង្កក្តីបារម្ភកាន់ តែខ្លាំង។វត្តមាន នៃវីរុសកូវីដ-១៩ ទម្រង់ថ្មីVUI-202012/01 បាន ធ្វើឲ្យប្រទេស ចំនួន៥០ ប្រកាសកាត់ បន្ថយការធ្វើដំណើរ ទៅកាន់ប្រទេស អង់គ្លេស។ បារាំងក៏បានបិទព្រំដែនជាមួយ អង់គ្លេសផងដែរ ប៉ុន្តែក្រោយរយៈពេល ៤៨ម៉ោង បារាំងក៏បានបើកទ្វារ ឡើងវិញ ដើម្បីដឹកជញ្ជូនទំនិញសំខាន់ៗ រវាងប្រទេសទាំងពីរ។
នៅថ្ងៃទី២៧ ខែធ្នូនេះដែរ បារាំងក៏ទទួលបាន វ៉ាក់សាំង កូវីដ-១៩ ពីក្រុមហ៊ុនPfizer-BioNTech ដើម្បីចាក់ជូន ពលរដ្ឋ។ ក្រៅពីប្រទេសបារាំង ប្រទេសទាំង២៧ ក្នុងសហគមន៍ អឺរ៉ុប ក៏ទទួលបានវ៉ាក់សាំងដូចគ្នា។ អឺរ៉ុប មាន ពលរដ្ឋ សរុបតែ៤៥០លាននាក់ប៉ុណ្ណោះ ដូច្នេះការចាក់វ៉ាក់សាំង ជូនដល់ ពលរដ្ឋទាំងអស់អាចនឹង ធ្វើឡើងយ៉ាង ឆាប់ផងដែរ៕
