កាលពីថ្ងៃទី ០៣ ខែមករា ឆ្នាំ ២០២១ កន្លងទៅនេះ ក្រសួងសុខាភិបាលថៃ បានចេញថ្លែងការពីស្ថានការណ៍ការ រីករាលដាលជំងឺកូវីដ១៩ ក្នុងប្រទេសថៃ។ ក្នុងនោះ ក្រសួងក៏បានប្រកាសថា ប្រទេសថៃ មានសមត្ថភាពផលិតវ៉ាក់សាំង កូវីដ១៩ ដោយខ្លួនឯងហើយ ដោយក្នុង ១ ឆ្នាំថៃគ្រោងនឹងអាចផលិតបានចំនួន ២០០ លានដូស។
ទន្ទឹមនឹងនោះ ក្រសួងក៏នឹងបញ្ជាទិញចូលវ៉ាក់សាំងពីប្រទេសចិនផងដែរ ដើម្បីធានាបាននូវបរិមាណផ្គត់ផ្គង់ ឱ្យបានគ្រប់គ្រាន់សម្រាប់ប្រជាជនថៃ។ ក្នុងនោះ ប្រជាជនថៃនឹងទទួល បានការចាក់វ៉ាក់សាំងឥតគិតថ្លៃ ពីរាជរដ្ឋាភិបាល ដោយមិនតិចជាង ៥០ ភាគរយនោះទេ។
ជាងនេះទៅទៀតនោះ ក្រសួងនឹងបញ្ចេញវ៉ាក់សាំង ដាក់ឱ្យប្រើប្រាស់ បណ្ដើរៗ នៅក្នុងដើមខែឧសភា ឆ្នាំ២០២១ ខាងមុខនេះហើយ។ យ៉ាងណាមិញ ក្រសួងសុខាភិបាលថៃ ក៏បានសហការ ជាមួយដៃគូផ្សេងៗ ដើម្បីឱ្យប្រាកដ ចិត្តថា ប្រជាជនថៃ នឹងអាចទទួលបាន វ៉ាក់សាំងការពារនេះ នៅរយៈពេល ដ៏ខ្លីខាងមុខនេះ។
ដូចគ្នានេះដែរ ក្រសួងមួយនេះ ក៏បានបញ្ជាក់ថា រាល់វ៉ាក់សាំង ដែលដាក់ជូនឱ្យប្រើប្រាស់នោះ គឺធានាបាន នូវគុណភាពប្រសិទ្ធិភាព ដោយឆ្លងកាត់ការ ត្រួតពិនិត្យបានយ៉ាង ច្បាស់លាស់ ដើម្បីធានា បាននូវសុខមាលភាពរបស់ប្រជាជនថៃ ៕
