លោក ហ៊ួត លាងឆេង នាយកវិទ្យាល័យ សម្តេចតេជោ ហ៊ុន សែន ស្ទឹងត្រង់ ត្រូវបាន ប្រជាពលរដ្ឋ ជាអាណាព្យាលសិស្ស ជាច្រើននាក់ចោទ ប្រកាន់ថា បានឃុបឃិត គ្នាជាមួយគ្រូបង្រៀនមុខវិជ្ជា ឯកទេស គីមីវិទ្យា និង រូបវិទ្យា ឈ្មោះ ប៉ូច កវី ដែលល្បីពូកែ គៀបសង្កត់សិស្សឲ្យរៀនគួរ និង ជំរិតទារ ប្រាក់ ពីសិស្សដោយគ្មាន ញញើតមាត់ ខណៈគ្រូ បង្រៀនរូបនេះ ក៏ធ្លាប់ត្រូវបាន មាតាបិតាសិស្សប្តឹងទៅ ប្រធានមន្ទីរ អប់រំ យុវជន និង កីឡា ខេត្តកំពង់ចាម ម្តងហើយដែរ។
ប្រជាពលរដ្ឋម្នាក់ ឲ្យ CPC NEWS ដឹង ក្នុងលក្ខខណ្ឌសុំ បញ្ចេញឈ្មោះ នៅថ្ងៃទី២០ ខែមករា ឆ្នាំ២០២១ ថា «ការណ៍ដែល លោក ប៉ូច កវី បានដៃជំរិតសិស្ស បែបនេះ គឺទទួលបានការបើកដៃយ៉ាង.ពេញទំ.ហឹ.ងពីលោក ហ៊ួត លាងឆេង នាយក វិទ្យាល័យសម្តេចតេជោ ហ៊ុន សែន ស្ទឹងត្រង់ នេះតែម្ដង ដោយគាត់បាន ទទួលលាភស.ក្ការៈពីលោកគ្រូ ប៉ូច កវី យ៉ាង ក្រាស់ក្រែល” ។
លោកបន្តថា ថ្មីៗនេះ លោក ហ៊ួត លាងឆេង នាយកវិទ្យាល័យ សម្តេចតេជោ ហ៊ុន សែន ស្ទឹងត្រង់ បានបើកដៃឲ្យក្រុមគ្រូ នៅវិទ្យាល័យស្ទឹង ត្រង់បង្រៀនគួរសិស្សក្នុងថ្នាក់ មានសិស្សច្រើនចាប់ពី ៦០ទៅ ៧០នាក់ ដោយមិនខ្លាចញញើត ជំងឺកូវីដ-១៩ ឡើយ ដោយសារគាត់បានទទួលលុយពីក្រុមគ្រូ បង្រៀនគួរទាំងនោះ។
ដោយឡែក បើយោងតាមលិខិតបង្គាប់ ការរបស់លោក លី ម៉េងសាន ប្រធានមន្ទីរអប់រំ យុវជន និងកីឡា ខេត្តកំពង់ចាម ចុះថ្ងៃទី៣១ ខែមីនា ឆ្នាំ២០២០ គឺសម្រួលភារ កិច្ចលោកគ្រូ ប៉ូច កវី បង្រៀនមុខ វិជ្ជាឯកទេស គីមីវិទ្យា មកបង្រើការងារ ជាបុគ្គលិករដ្ឋបាលនៅទីចាត់ ការវិទ្យាល័យ សម្តេចតេជោ ហ៊ុន សែន ស្ទឹងត្រង់វិញ ចាប់ ពីថ្ងៃចុះហត្ថលេខាងនេះ តទៅ ។
ប៉ុន្តែអ្វីដែលធ្វើអោយមាន ការភ្ញាក់ផ្អើល និងហួសចិត្តនោះ គឺ បន្ទាប់ពីបើកបវេសនកាលថ្មីនេះ គេឃើញមាន វត្តមានលោកគ្រូ ប៉ូច កវី នៅតែមានឈ្មោះបង្រៀនដដែល ទើបអាណាព្យា បាលសិស្ស ចោទប្រកាន់ថា លោក ហួត លាងឆេង នាយកវិទ្យាល័យនេះ បានឃុបឃិតគ្នាជាមួយ លោកគ្រូ ប៉ូច កវី បំពានលិខិត របស់ប្រធានមន្ទីរអប់រំខេត្តកំពង់ចាម ។
ជុំវិញបញ្ហានេះដែរ CPC NEWS បានទំនាក់ទំនង លោក ហ៊ួត លាងឆេង នាយកវិទ្យាល័យសម្តេចតេជោ ហ៊ុន សែន ស្ទឹងត្រង់ ដែរ នៅថ្ងៃទី២១ ខែមករា ឆ្នាំ២០២១ នេះ ដើម្បីបញ្ជាក់អំពីបញ្ហានេះ ប៉ុន្តែ លោកបាន ឆ្លើយប្រាប់ថា កំពុងជាប់រវល់ ប្រជុំសិន កុំអាល់សួរ រួចក៏ចុច បិទទូរស័ព្ទតែម្តង ។
ទោះបីជាយ៉ាងណាក៏ដោយ ប្រជាពលរដ្ឋ បានសំណូមពរយ៉ាងទទួច ទៅដល់ប្រធានមន្ទីរអប់រំ យុវជន និងកីឡា ខេត្តកំពង់ចាម សូមជួយពិនិត្យ មើលករណី នេះ ផង៕
